Online-spräkekurse
E Friisk Foriining büt en fraschkurs (bökinghiirder frasch - mooring) for önjfångere än foramkiimene önj, wat iinjtooch önj e waag stää fant.
Enarken ma en pc än gou interneet koon bai da leksjoone ma e nordfrasche teooter- än filmemååger Gary Funck diiljnaame, motiwasjoon än di wale tut maårben san forütseeting.
Müüljfloose san manschne önj än bütefoor Nordfraschlönj, wat frasch meeklik foon tuhüs üt liire wan, ouers likes ai en ruchten dotsänt än maschoulere maste wal.
Fort diiljnaamen as e instalasjoon än grünleeden waasen foon e software Zoom forütseeting.
Üüs kurse san önj e uugensteblak gödj beseecht än åål plååtse beläit. Wan dü likes hål deerbai weese wäät, mald de iinjfåch bai üs - we naame die hål ma aw e täiwelist!
Frasch for önjfångere
Di kurs for önjfångere as arken törsdi eeftermadi, än ruchted ham tu önjfångere suner forwaasen tut frasch, än tu spreegere foon oudere nordfrasche dialäkte, wat et fååstewåålsfrasch hål liire wan.
Frasch for foramkiimene
Di kurs for foramkiimene as arken törsdi eeftermadi, än ruchted ham tu manschne, wat ål hu erfååringe mat fååstewåålsfrasch heewe, än e späke tu en wasen diilj ferstönje än snååke koone.
